जसपाले बहुमत पाए मुख्यमन्त्री योगेन्द्र यादव बन्नेछन :- देवेन्द्र मिश्रा

ओम प्रकाश यादव

रौतहट, कार्तिक १८। जनता समाजवादी पार्टी नेपालका राजनीति समिति सदस्य देवेन्द्र मिश्राले मधेश प्रदेशको अबको मुख्यमन्त्री जसपाका केन्द्रिय सदस्य योगेन्द्र यादव बन्ने बताएका छन् ।

आसन्न मंसिर ४ गते हुने प्रतिनिधि सभा र प्रदेश सभा सदस्य निर्वाचनमा जसपाले बहुमत पाए मुख्यमन्त्री योगेन्द्र यादव नै बन्ने नेता मिश्राले ठोकुवा गरेका हुन् । रौतहटको माधवनारायण नगरपालिकाको माधोपुर, विसुनपुर्वा मानपुर लगाएत ठाउँमा शुक्रवार आयोजित चुनावी कोणसभालाई सम्बोधन गर्दै जसपा नेता मिश्राले मंसिर ४ गतेपछि मधेशमा जसपा नै पहिलो दल बन्ने र जसपाले नै फेरी मधेश प्रदेश सरकारको नेतृत्व गर्ने बताए ।

जनता समाजवादी पार्टी मधेश र मधेशी जनताको हक अधिकार तथा पहिचानका लागि ठुलो लडाइ लड्दै आइरहेकोले मधेशमा पुनः जसपाले नै बहुमत पाउने उनले विश्वास व्यक्त गरे । मधेशवादी दल जसपा प्रति दिनदिनै जनताको आकर्षण बढ्दै गएको र मधेशवादी दलका उम्मेदवारहरुलाई जिताउन आम जनता निकै उत्साहित रहेकोले निर्वाचनपछि जसपाकै नेतृत्वमा सरकार बन्ने र यस सरकारको नेतृत्व हालका मधेश प्रदेशका भूमि व्यवस्था तथा कृषि सहकारी राज्य मन्त्री एवं रौतहट क्षेत्र नं १ (ख) का उम्मेदवार योगेन्द्र यादवले नै गर्ने उनले बताए ।

मुख्यमन्त्री बन्ने दौडमा रहेका यादवलाई आउँदो निर्वाचनमा बहुमत दिएर विजयी गराउन पनि उनले आम मतदाताहरुलाई आग्रह गरेका थिए । यादव स्पष्ट वक्ता, शिक्षित, निडर र प्रदेश हाक्न सक्ने क्षमतावान नेता रहेकोले अबको मुख्यमन्त्री उनले नै बन्नुपर्ने उनले दोहरयाएका थिए ।